اسلام آباد:پاکستان کی فضائی حدود ہر قسم کی پروازوں کے لیے مکمل طور پر بحال کردی گئی جس کا نوٹم جاری کردیا گیا۔
ترجمان پاکستان ایئرپورٹس اتھارٹی کے مطابق ملک کے تمام ائیرپورٹس معمول کے فلائٹ آپریشن کے لیے دستیاب ہیں۔
پاکستان ائیرپورٹس اتھارٹی کے مطابق مسافروں سے گزارش ہے کہ اپنی پروازوں کے تازہ ترین شیڈول کے لیے متعلقہ ایئرلائن سے رابطہ کریں۔
پاکستان میں فضائی بندش کے خاتمے کے ساتھ ہی پی ائی اے کا آپریشن بحال ہونا شروع ہوگیا۔
پی آئی اے کا آپریشن بحال
پی آئی اے کے ترجمان نے فلائٹ آپریشن بحال ہونے کی تصدیق کی ہے۔
ترجمان کے مطابق پی آئی اے کی پیرس تا اسلام آباد پرواز پی کے 750 جو علی الصبح کوئٹہ اتار لی گئی تھی، رات 9 بجے اسلام آباد واپس روانہ ہوگی،پی آئی اے کے دیگر آپریشن بھی رات 10 بجے سے بحال ہوجائیں گے اور تمام رکی ہوئی یا تاخیر کا شکار پروازیں آپریٹ ہوں گی۔
ترجمان کے مطابق وہ مسافر جو واپس اپنے گھروں کو چلے گئے تھے یا وہ جن کو ہوٹلوں میں ٹھہرایا گیا تھا ان سے رابطہ کر کے واپس ائیرپورٹ بلایا جارہا ہے،جہازوں اور دیگر ساز و سامان جو حفظ ماتقدم کے طور پر محفوظ مقامات پر منتقل کردیئے گئے تھے، انہیں واپس آپریشن ایریا میں لایا جارہا ہے۔
ترجمان پی آئی اے کے مطابق فضائی بندش اور آپریشن متاثر ہونے کی باعث جو مسافروں کو زحمت ہوئی اس کے لیے معذرت خواہ ہیں مگر حالات کے پیش نظر احتیاط بہت ضروری تھی۔
