گرمیوں میں انڈے کھانے کو اکثر نقصان دہ سمجھا جاتا ہے، لیکن یہ مکمل طور پر درست نہیں ہے۔
حقیقت میں انڈے ہر موسم میں فائدہ مند ہو سکتے ہیں، بشرطیکہ انہیں درست مقدار اور مناسب طریقے سے استعمال کیا جائے۔
انڈے جسم کو ضروری پروٹین، وٹامنز اور منرلز فراہم کرتے ہیں۔ یہ دل، دماغ اور ہڈیوں کی صحت کے لیے فائدہ مند ہیں۔ گرمیوں میں اکثر جسم نڈھال ہو جاتا ہے جس میں انڈے توانائی بحال کرنے میں بھی مدد دیتے ہیں۔
لیکن اگر آپ بہت زیادہ انڈے کھائیں تو جسم میں گرمی یا بدہضمی ہو سکتی ہے۔ گرمیوں میں انڈے فرائی کرنے کے بجائے اُبال کر کھانا بہتر ہے تاکہ چکنائی سے بچا جا سکے۔ اسی طرح گرمی کے موسم میں جلد خراب ہونے کا خدشہ ہوتا ہے، اس لیے تازہ انڈے استعمال کرنا ضروری ہے۔
ماہرینِ تغذیہ کے مطابق اگر آپ روزانہ 1 انڈہ (خصوصاً سفیدی) استعمال کریں تو اس سے نقصان کا خطرہ نہیں ہوتا۔ دل یا کولیسٹرول کے مریضوں کو زردی محدود مقدار میں استعمال کرنی چاہیے۔
