بنگلا دیش کی حکومت کی جانب سے اپنی ٹیم کو پاکستان کے خلاف سیریز کی اجازت دینے کا قوی امکان ظاہر کیا جارہا ہے۔
بنگلادیشی کرکٹ بورڈ نے جمعرات کے روز جاری اپنے بیان میں بتایا کہ ہمیں پاکستان کیخلاف شیڈول سیریز کے حوالے سے حکومت کی جانب سے مثبت اشارے ملے ہیں اور امید ہے کہ دونوں ممالک کے درمیان سیریز ہوگی۔
اعلامیے کے مطابق حکومت نے پاکستان کے دورے کی اجازت دینے پر غور شروع کردیا ہے اور جلد اس حوالے سے باضابطہ اجازت نامہ بورڈ کو ملنے کا بھی امکان ہے۔
بنگلادیش کرکٹ بورڈ کا کہنا ہے کہ حکومت تقریبا پاکستان کے دورے پر رضامند ہے اور صرف رسمی کارروائی ہونا باقی ہے، دونوں ممالک کے درمیان 5 ٹی 20 میچز کی سیریز کھیلی جائے گی۔
واضح رہے کہ اس سے قبل بنگلادیش کرکٹ بورڈ نے اپنے کھلاڑیوں کو پاکستان کے دورے کے حوالے سے دستاویزات مکمل کرنے کی ہدایت کی تھی۔
بنگلادیش کی ٹیم متحدہ عرب امارات سے دو میچز کی سیریز کھیلنے کیلیے یو اے ای پہنچ گئیہ ہے جہاں شارجہ میں دونوں ممالک کی ٹیمیں 17 اور 19 مئی کو مدمقابل آئیں گی۔
پاک بنگلادیش سیریز کا مجوزہ پلان
دوسری جانب پاکستان اور بنگلا دیش کے خلاف سیریز کا نیا مجوزہ پلان سامنے آگیا، پانچ ٹی ٹوئنٹی میچز کی سیریز کا آغآز اب لاہور سے ہونے کا امکان ہے۔
ذرائع کا کہنا ہے کہ پاکستان کرکٹ بورڈ کی جانب سے حتمی شیڈول مقامی معاملات طے ہونے کے بعد جاری کیا جائے گا۔ پی ایس ایل کو ری شیڈول کرنے کے بعد اب پاکستان اور بنگلہ دیش کے سیریز کا نیا پروگرام ترتیب دیا جارہا ہے۔
ذرائع کےمطابق نئی تجویز کے تحت اب ستائیس مئی کو پہلا میچ قذافی اسٹیڈیم میں کرانے کا جائزہ لیا جارہاہے۔ جس کے بعد دو میچز کی میزبانی فیصل آباد کو سونپی جائے گی جبکہ سیریز کے آخری دو میچ لاہور میں ہونے کا امکان ہے۔
