چین میں مسلسل چھینکوں اور بہتی ناک کے مسئلے میں مبتلا ایک نوجوان کی ناک سے 20 برس سے زیادہ عرصے بعد ناک میں پھنسے پانسے کو نکال لیا گیا۔
ساؤتھ چائنا مارننگ پوسٹ کے مطابق شمالی چین کے صوبے شانشی سے تعلق رکھنے والا 23 سالہ نوجوان شیاؤما تقریباً ایک ماہ سے چھینکوں، ناک بند رہنے اور مسلسل ناک بہنے کی تکلیف میں مبتلا تھا۔
روایتی چینی ادویات سے خود کا علاج کرنے میں ناکامی کے بعد شیاؤما نے طبی مدد کے لیے شیان گاؤشن اسپتال کا رخ کیا۔
کلینک کے میڈیکل ریکارڈ کے مطابق اسپتال نے ان میں الرجک رہائنٹس کی تشخیص کی اور بتایا کہ ان کی ناک میں کوئی چیز پھنسی ہوئی ہے۔
بعد ازاں یینگ رونگ کی جانب سے کی جانے والی نیسل اینڈو اسکوپی میں معلوم ہوا کہ شیاؤما کی ناک میں ایک پانسہ پھنسا ہوا ہے۔
یینگ نے بتایا کہ ناک کی اینڈو اسکوپی کے دوران دیکھا گیا کہ کوئی سفید سی بیرونی شے ناک میں اٹکی ہوئی ہے۔ اس کو نکالنے پر معلوم ہوا کہ یہ دو سینٹی میٹر کا ایک پانسہ ہے جو ناک کے اندرونی حصے کی بیرونی پرت کو نقصان پہنچا رہا تھا۔
شیاؤما نے اس متعلق بتایا کہ جب وہ تین یا چار برس کے تھے تو عین ممکن ہے کہ پانسہ حادثاتی طور پر ان کی ناک میں چلا گیا ہو۔ البتہ یہ بات واضح نہیں کہ وہ ناک کے اس حصے تک پہنچا کیسے۔
