چیمپئینز کپ کرکٹ کا مستقبل خطرے میں پڑگیا، اس کی جگہ پینٹنگولر کپ کو بحال کرنے کی باتیں ہونے لگیں۔
تفصیلات کے مطابق ڈومیسٹک کرکٹ سے مطلوبہ نتائج نہ ملنے پر پی سی بی نے گزشتہ دنوں اصلاحات کیلئے ایک کمیٹی قائم کی تھی، اس کا پہلا اجلاس گزشتہ دنوں منعقد ہوا۔
ذرائع نے بتایا کہ مطلوبہ فوائد نہ ملنے پر چیمپئینز کپ کو ختم کرنے پر غور ہونے لگا، 50 لاکھ روپے ماہانہ تنخواہیں لینے والے مینٹورز کا مستقبل کیا ہوگا اس پر ابھی کوئی فیصلہ نہیں ہوا، ایک تجویز انھیں کوئی اور کام سونپنے کی بھی ہے، ماضی کی طرح چار روزہ، ون ڈے اور ٹی20 پینٹنگولر ٹورنامنٹس کرانے پر بھی بات ہوئی۔
اس میں قائد اعظم ٹرافی اور ڈپارٹمنٹل ایونٹ کی دونوں فائنلسٹ سائیڈز سمیت ایک پی سی بی کی ٹیم شامل کرنے پر تبادلہ خیال کیا گیا، اس میں ملک بھر کے بہترین کرکٹرز کو لیا جائے گا،ہر ٹیم کے ساتھ پروفیشنل کوچ کا تقرر ہوگا، میٹنگ میں ریجنز کے نمائندوں نے ڈومیسٹک ٹیموں کی تعداد 18 سے 9 کرنے کی تجویز مسترد کردی۔
سلور اور گولڈ کی الگ کیٹیگریز میں شمولیت، چھوٹے شہروں کی ٹیموں کو یکجا یا ریجنز و ڈپارٹمنٹ کو ایک ساتھ کرنے کی باتیں بھی انھیں متاثر نہ کر پائیں، ان کا کہنا تھا کہ موجودہ ٹیمیں 3 سال تک برقرار رکھنے کا فیصلہ ہوا تھا، اسے ایک برس میں ہی تبدیل کرنے کا کوئی جواز نہیں ہے۔
ایک ریجنل آفیشل نے سلیکشن سمیت دیگر امور میں پی سی بی شعبہ ڈومیسٹک کرکٹ کی مداخلت کو مسائل کی جڑ قرار دیتے ہوئے کہا کہ ہمیں خود تمام انتظامات سنبھالنے کی اجازت ہونی چاہیے، چھوٹے شہروں سے ٹیلنٹ نہ آنے پر بھارتی رنجی ٹرافی کی مثال دیتے ہوئے کہا گیا کہ جھاڑکھنڈ سے صرف ایک سپراسٹار مہندرا سنگھ دھونی سامنے آیا مگر وہاں کی ٹیم ڈومیسٹک ایونٹ میں ہمیشہ شامل ہوتی ہے۔
آسٹریلوی کرکٹ میں اسٹیو وا کے بارے میں بھی ایسی ہی مثال دی گئی۔
شرکا نے بورڈ پر زور دیا کہ ٹیمیں برقرار رکھتے ہوئے کوالٹی بہتر بنانے پر توجہ دیں اس سے مطلوبہ نتائج حاصل ہو سکیں گے، اس حوالے سے اگلی میٹنگ میں چیئرمین پی سی بی محسن نقوی کی آمد بھی متوقع ہے۔
