کراچی:پاکستان اسٹاک ایکسچینج میں شدید مندی کا رجحان ہے، جس کی وجہ سے کاروبار بند کرتے ہوئے آؤٹ اسٹینڈنگ سودے منسوخ کردیے گئے۔
امریکی صدر ڈونلڈ ٹرمپ کی جانب سے کئی ممالک پر نئے ٹیرف عائد کیے جانے کے بعد خود امریکا سمیت ایشیا اور خلیجی ملکوں کی اسٹاک مارکیٹ پر منفی اثرات نمایاں ہو رہے ہیں۔
بازارِ حصص میں صبح کاروبار کے آغاز ہی سے شدید مندی کا رجحان تھا۔ ابتدا میں کے ایس ای 100 انڈیکس 3331.22 پوائنٹس کم ہونے سے انڈیکس 115460 پوائنٹس کی سطح پر آیا۔
بعد ازاں پاکستان اسٹاک ایکسچینج میں شدید مندی کی جانب رجحان بڑھتا رہا جس کے نتیجے میں سرکٹ بریکر آن ہوگیا اور اسٹاک ایکس چینج میں ٹریڈنگ معطل کردی گئی۔
اسی دوران انڈیکس 6287 پوائنٹس کمی سے 112504 پوائنٹس کی سطح پر آگیا۔
اسی طرح پی ایس ایکس میں 45 انڈیکس 5 فیصد کمی کے باعث لوئر سرکٹ بریکر آن ہوگیا اور ٹریڈنگ معطل کردی گئی ۔ مارکیٹ میں کاروباری سرگرمیاں کچھ دیر کے لیے بند کیے جانے کے بعد بحال کردی گئیں، تاہم اس سے قبل شدید مندی کی مدت کے تمام آؤٹ اسٹینڈنگ سودے منسوخ کردیے گئے تھے۔
پی ایس ایکس کے اعلامیے کے مطابق ایکویٹی اور ایکویٹی بیسڈ مارکیٹ 46 منت تک بند رہی۔
بحالی کے بعد بازارِ حصص میں ٹریڈنگ شروع ہوئی، تاہم مارکیٹ مندی کی لپیٹ میں رہی اور کے ایس ای 100 انڈیکس 7734.77 پوائنٹس کم ہوکر 111,056.89 پوائنٹس کی سطح پر ٹریڈ کرتا رہا۔
پاکستان اسٹاک ایکسچینج میں کاروبار کے اختتام تک جزوی ریکوری ہوئی اور انڈیکس 3882 پوائنٹس کمی سے 114909 پوائنٹس پر بند ہوا۔
واضح رہے کہ امریکی صدر ڈونلڈ ٹرمپ کے مختلف ممالک پر عائد کیے گئے ٹیرف کے بعد امریکی اسٹاک ایکسچینج میں 2 دنوں کے دوران سرمایہ کاروں کے 60 کھرب ڈالر ڈوب چکے ہیں جب کہ ایشیائی اسٹاک مارکیٹس میں بھی شدید مندی کے رجحانات پائے جا رہے ہیں۔
اسی طرح سعودی عرب کی اسٹاک مارکیٹ میں بھی سرمایہ کاروں کے 500 ارب ریال ڈوب گئے۔ سعودی عرب کے علاوہ بحرین، قطر، مسقط اور کویت کی اسٹاک مارکیٹوں پر بھی منفی اثرات نظر آ رہے ہیں۔
